Mæli með þessu bloggi

Ég get ekki látið ykkur missa af þessum bloggara.
Þetta er hann Þórður og hann er æskuvinur Mumma bróður. Hann er held ég núna háseti á skemmtiferðaskipi í suðurhöfum, bara næstum því eins og pabbi hennar Línu Langsokks. Bloggið hans er um allt og samt aðallega ekkert en hann er mjög drepfyndinn. Var t.d. að lesa þetta af síðunni hans. Vona að það sé í lagi að koppí/peista af annarra manna bloggi:


Af síðunni "Lítið af viti, en samt..."

"sunnudagur, júlí 10, 2005

Og mér finnst það í góðu lagi
Lag dagsins er með GCD. Sumarið er tíminn. Hér er sumar og gumar gleðjast yfir því. Ekki mikið sumar heima og er það slæmt. Eða hvað. Mér er eiginlega alveg sama. Af tómri eigingirni hef ég engar áhyggjur af veðrinu á Íslandi, nema ef ég væri sjálfur heima til að njóta þess. Mér finnst rigningin góð. Það er ekki satt. Þetta er hinsvegar úr gömlu dægurlagi sem SSSólflokkurinn flutti hér um árið. Það er ekki lag dagsins. Ekki hér í Púertó Ríkó. Enda rignir ekki hér. En þá má kannski segja að heimamönnum finnist sjálfsagt rigningin góð þegar það loksins rignir. Hvað veit ég. Þeir habla espanjól. Ekki ég. Það er konugrey búið að vera að hringja í mig í allan dag. Vitlaust númer. Ég hablaði við hana á íslensku og hún á móti espanjól. Við skildum hvorugt hvað hitt var að segja. Ég er kannski hálffeginn að hún skildi ekki það sem ég sagði henni. Hún hefði örugglega ekki kunnað að meta það.

Nýkominn úr baði. Í hreinum fötum. Maður er aldrei eins vel undirbúinn að lenda í umferðaróhappi og á sjúkrahúsi eins og þegar maður er nýþveginn og í hreinum fötum. Það var allavega viðmið í gamla daga. Að hafa haft vit á að fara í hrein nærföt áður en maður varð fyrir bíl. Og þá passa sig á að pissa ekki í sig af hræðslu. Það eyðileggur sennilega allan undirbúninginn og fyrirhöfnina. Og hver planar það annars að lenda í umferðarslysi? Það væri heimskulegt.

GCD er alheims.

Eitthvað af viti á morgun!"

vista-blogga-senda blogg