Dúkkan og kallinn

Hædíhó hvernig hafið þið það?

Hér er rigning og ekkert spes og ég er löt og það er mánudagur og seinni partinn er ég að fara í fyrstu ræktina eftir jólafrí...úff það mun taka á!!!

Helgin var fín. Á föstudag fórum við út að borða með Agnesi, Jesse og Olgu vinkonu Agnesar. Við fórum á stað inni í Born og það var biluð kyndingin þannig að ég sat í úlpunni allan tíman en það skemmdi ekki fyrir góða matnum sem ég fékk amminamm. Dádýrasteik með þykkti súkkulaðisósu!! Já...brjálað! Svo skruppum við aðeins á pöbbann og svo heim.

Á laugardeginum fórum við og fengum okkur Maoz kebab og skrubbum svo á Picasso safnið. Maður verður að vera menningarlegur og skoða borgina sína áður en það verður of seint.

Um kvöldið var svo glápt á video eins og okkur væri borgað fyrir það. Lord of war með Nick Cage og Constant Gardener með Ralph Fiennes. Báðar nokkuð góðar og báðar gerast slatta í Afríku þannig að það var svona Afríkuþema.

Í gær horfðum við svo á 2. þátt af Júróvisjón forval. Ég get nú bara ekki látið vera að segja mína skoðun á júró þetta árið. Ég vil lýsa yfir ánægju minni á spurningaþáttunum fyrir forvalsþáttin og ég er alveg búin að sjá það að ég er mikill júrófan því ég veit í alveg ótrúlega mörgum tilvikum svörin við spurningunum. Fyrsta skipti sem ég upplifi það þegar ég horfi á spurningaþátt þannig að það hlýtur að segja mér eitthvað.

Svo byrjaði forvalsþáttur númer 2. Ég horfði líka í síðustu viku og hafði bara nokkuð gaman af. Lögin voru reyndar mjög misjöfn og meira verri lögum heldur en góðum. Einnig fannst mér kynnarnir, Brynhildur og Garðar vera helst til formleg. Tilfinninf mín var eins og maður væri að horfa á leikrit eða tvö ljóðskáld að flytja ljóð sín saman, háfleygi og skýrmæli alveg að kæfa mann. Lagið sem mér fannst bera af það kvöld og alls ekki þurfa fleiri kvöld til að finna fleiri lög var lagið sem hún Regína söng. Þjóðlagafílíngur með mikilli rödd og býður upp á brjálaðar trommur, goth og trylling á sviðinu í Grikklandi í vor.

Svo kom þátturinn á laugardag. Lögin voru flest óminnileg og laglínuléleg að mínu mati og ber þá hæst lagið sem Geir Iceblue söng. Man ég helst eftir því vegna þess að mér leið eiginlega hálf illa á meðan ég var að hlusta það. Hann Geir lét hafa sérstaklega eftir sér fyrir flutning lagsins að hann væri þarna til þess að sigra....hefði þá ekki verið mál að vanda sig kannski við flutning lagsins?? Það hefði kannski verið fyrsta skrefið. Mér fannst lagið ekkert sérstakt en það er annað mál og ég ætla ekki að vera að dissa mann og annan en Geir á það alveg skilið;)
Ég get ekki látið vera að nefna kynnana aftur. Ég veit ekki hvað hún Brynhildur er gömul en ég veit að hún er eldri en ég og ég veit líka að aldur er afstætt hugtak. Ég veit það manna best því ég er sko ekki eins gömul og ég er!!! En kjóllinn sem hún var látin vera í á laugó var ekki alveg að meika það. Þetta var eiginlega svona mitt á milli þess að vera fermingarkjóll og dúkkukjóll og að horfa á hana og Garðar um helgina var eins og að horfa á talandi dúkku og gamlan kall sjá um Stundina Okkar.
Sorrý, ég vil ekki vera dómhörð og vona að ég verði fullkomin alla ævi svo engin segi neitt um mig.:)))

Ps. Mér finnst ennþá eftir tvo þætti lagið sem Regína syngur "Þér við hlið" vera ýkt flott - Go Regína

vista-blogga-senda blogg